पुणे : गोयल गंगा फाउंडेशनकडून बावधन येथील गंगा लेजंड येथे पतांगोत्सवाचे आयोजन करण्यात आले होते. त्याला नागरिकांचा चांगला प्रतिसाद मिळाला.
यात गोयल गंगा इंटरनॅशनल स्कूलच्या विद्यार्थ्यांसह लहान मुले, महिला, वयोवृद्धांनीही पतंगोत्सवाचा आनंद लुटला. कुटुंबासमवेत बहुरंगी पतंग उडविण्यात सर्वजण दंग झालेले पहायला मिळाले. या कार्यक्रमाचे औचित्य साधून गंगा लेजंड येथे दीड वर्षापासून ते पाच वर्षांपर्यंतच्या मुलांसाठी ‘गंगा अथ’ ही पूर्व प्राथमिक शाळा सुरू करण्यात आली.
‘गोयल गंगा’चे विश्वस्त जयप्रकाश गोयल म्हणाले, ‘आज एकीकडे समाजात जात, पात, वर्ण अशा मतभेदातून नकारात्मक संदेश जात आहे. असे असताना आपल्याला लाभलेली सणांची संस्कृती ही यावर मात करण्याची मोठी ताकद आहे. आज या सणाच्या निमित्ताने आपण सर्वजण माणुसकीच्या भावनेने एकत्र आलो. यातूनच मानवतेचा सकारात्मक संदेश जातो. आनंदासाठी, एकोप्यासाठी असे सण-उत्सव एकत्र साजरा करण्यावर आमचा भर असतो.’
